مکتوب الیہ: میرے پیارے اللہ جی!

میرے مالک!

آج دسواں روزہ ہے۔ سورج ڈھلنے کے ساتھ ہی رحمت کا پہلا عشرہ بھی ہم سے رخصت ہو رہا ہے۔ میں اس احساس سے کانپ اٹھا ہوں کہ دس دن بیت گئے اور میں اب بھی وہیں کھڑا ہوں جہاں پہلے دن تھا۔ کیا میں نے ان دس دنوں میں تیری رحمت کو سمیٹا؟ یا میں صرف سحر و افطار کی گنتی میں ہی لگا رہا؟

میرے اللہ!

"توبہ" کا مطلب تو پلٹ آنا ہے، لیکن میں کتنا عجیب ہوں کہ ہر بار تیری طرف پلٹنے کا وعدہ کرتا ہوں اور پھر گناہوں کی اسی پرانی ڈگر پر چل پڑتا ہوں۔ میری توبہ بھی توبہ کی محتاج ہے۔ میں زبان سے "استغفراللہ" کہتا ہوں لیکن میرا دل اب بھی ان لذتوں سے جڑا ہے جو مجھے تجھ سے دور کرتی ہیں۔ مالک! مجھے ایسی توبہ عطا کر دے جو محض لفظوں کا کھیل نہ ہو، بلکہ میرے وجود کی تبدیلی بن جائے۔

میرے پیارے رب!

آج اس پہلے عشرے کی آخری ساعات میں، میں اپنی تمام کوتاہیوں کی گٹھڑی تیرے سامنے رکھتا ہوں۔ میں نے ان دس دنوں میں بھی غیبت کی ہوگی، میں نے ان دس دنوں میں بھی نظریں نہیں جھکائی ہوں گی، میں نے ان دس دنوں میں بھی کسی کا دل دکھایا ہوگا۔ لیکن میرا یقین کہتا ہے کہ تیری رحمت میرے گناہوں سے کہیں زیادہ بڑی ہے۔ اگر تو نے مجھے معاف نہ کیا تو میں کہاں جاؤں گا؟ تیری چوکھٹ کے علاوہ میرا کوئی اور ٹھکانہ نہیں ہے۔

میرے مولا!

رحمت کا یہ عشرہ جاتے جاتے مجھے وہ "معافی کا پروانہ" دے دے جو مجھے اگلے دو عشروں کے لیے تیار کر دے۔ میری روح کے میل کو دھو ڈال۔ مجھے گناہوں سے ایسی نفرت دے دے جیسی ایک تندرست آدمی کو گندگی سے ہوتی ہے۔

آج کی افطار میرے لیے محض بھوک کا خاتمہ نہ ہو، بلکہ میرے پچھلے تمام گناہوں کے خاتمے کا جشن ہو۔ مجھے قبول کر لے مالک! اس سے پہلے کہ یہ مہینہ گزر جائے اور میں محروم رہ جاؤں۔

فقط،

آپ کا وہ شرمسار بندہ، جو اب سچے دل سے پلٹ آیا ہے۔

خالد سیف اللہ موتیہاری